Nadine Ammari in der Werkstatt
zrugg zu de Lüüt Nadine Ammari

D Nadine.

  1. Wer bisch du und was machsch du,
    wenn du grad nöd für de QV interviewt wirsch?

    Ich bin d Nadine Ammari.
    Wänn ich grad kei Interviews gibe,
    misch ich wertvolli Zuetate zu hochwertige Schönheitsprodukt
    oder bin viel i de Natur unterwägs.

  2. Vervollständige de Satz:
    «Robehuuse isch für mich ...»

    wie e chlini heili Wält
    uf ere zimli verrückte Erdä.

  3. Was isch din Lieblingsort in Robehuuse
    und warum genau det?

    Uf em Baumstammbänkli vo de Messikommer-Eiche
    mit em Gsicht i de Sunnä.

  4. Hand ufs Herz:
    Was nervt dich mängisch a Robehuuse?

    Wänn keis Verständniss für d Bedürfniss vo verschidene Generatione da isch
    und kei Rücksicht gno wird.

  5. Du bechunsch 10'000 Franke und muesch alles für Robehuuse usgeh.
    Was machsch demit?

    Ich würd e cooli Version vo enem Freiziitplatz
    als Begegnigsort schaffe.
    Mit Grillstell, Sitzplätz, Spielplatz
    und no viel meh.

  6. Was isch öppis, wo du richtig guet chasch,
    aber fascht niemert vo dir weiss?

    Ich chan super schöni Fotografie schüsse.

  7. Für was chönnt me dich mitten i de Nacht wecke?

    Für e heissi Schoggi
    und es guets Gspröch am Chaminfüür.

  8. Bisch Team Hund, Chatz, Elefant oder Einhorn?

    Einhorn.

  9. Mit wellere bekannte Person würdsch gern mal
    uf em Rössliplatz en Kafi trinke
    und über was würdet ihr rede?

    Mit em Albert Einstein –
    und wie är d Wält verstande hät.

  10. Warum Naturkosmetik?

    Wäge mim Verständniss,
    wie Mänsch und Natur mitenand sötted funktioniere.
    Ich find, dass i de Schönheits- und Gsundheitspfläg
    d Natur uf fascht alles e Antwort hät.
    Inzwüsche isch das für mich nöd nur Passion,
    sondern e ächti Mission.

  11. Welche Person us Robehuuse sötted mir als Nächstes interviewe
    und warum?

    D Nicole Roccetthi,
    d Leiterin vom FIZ.